Sundowner-academy w Budyšinje měri so na wšitkich zajimcow

Budyšin (SN/MiR). Röhscheidtowa bašta w Serbskim ludowym ansamblu stanje so z akademiju. Iniciator Budyskeje bary Sundowner Beno Brězan chce ze zajimawymi, wosebje pak načasnymi přednoškami a diskusijemi baštu dale wožiwić. W juliju a awgusće wotměja so na žurli tak mjenowane business eventy, to rěka zarjadowanja po swjatoku, kotrež zaběraja so z tym, kak ćeže při rjadowanju powołanskeho abo wosobinskeho žiwjenja zmištrować. „Přednoški, kotrež sym druhdźe słyšał, su mje k tomu pohnuli sam tajku akademiju zrodźić“, praji Beno Brězan, „loni sym jako za techniku zarjadowanja zamołwity temu sćěhował, kak zamóžeš z pomocu techniki dychanja swoju runowahu namakać. Lětsa dožiwich seminar wo natwarje a motiwaciji teama. A prašach so, hač njeby so poskitk tež za Budyšanow a zajimcow z wokoliny hodźał. Potom sym započał poskitk přihotować. Nětko so nadźijam, zo so zajimcy wědy přednošowacych nasrěbaja a zo swoje nazhonjenja dźěla.“ Impulsowe přednoški maja so w lochkej formje wotměć.