Ze swjedźenjom chcedźa dźěći pohonjować, dale wuknyć

Radwor (SN/MiR). W Radworskej wjacezaměrowej hali „Slavia“ je dźensa wjace hač sto dźěći zabawny dźeń dožiwiło. Budyski Rěčny centrum Witaj (RCW) je mjeztym 14. raz na Swjedźeń serbskeje rěče přeprosył. „Chcemy šulerjam, kotřiž serbšćinu jako cuzu rěč wuknu, wosebity dźeń a rjane dožiwjenja ze serbskej rěču poskićeć“, praji Weronika Butendeichowa z RCW, kotraž je za swjedźeń zamołwita, „wšako woni wot doma serbšćinu zwjetša njeznaja, ale ju na šuli wuknu. Zarjadowanje je tuž wosebita motiwacija w tym njepopušćić.“ Lětsa su so Kulowska, Slepjanska a Wojerowska zakładna šula přizjewili. Radworske kubłanišćo je wospjet hosćićelka tohole zetkanja. Kubłanišći zakładna šula Wulka Dubrawa a Bart běštej spočatnje připowědźiłoj, zo na swjedźeń přijědu. Krótko do zetkanja pak su personelnych přičin abo wuskosćow časa dla wotprajić dyrbjeli. Hladajo na to rozmysluje RCW wo tym dotalnu koncepciju předźěłać.