Wo projekće „Serbski kubłanski system přichoda“ mysle šěroko wuměnjeć

Budyšin/Njebjelčicy (SN/at). Tematika kubłanskeje awtonomije Serbow dale pači. To je hłowna zhromadźizna Domowiny 22. apryla wospjet wuwědomiła. Wjetšina delegatkow a delegatow bě namjet „konsekwentne prócowanje wo kubłansku awtonomiju serbskeho ludu“ sobustawow Domowiny wotpokazała, kotřiž angažuja so w Serbskim sejmje abo z jeho zaměrami sympatizuja. Zapodawarjo analyzowachu diskusiju. Zwěsćachu, zo trjebaja dalše praktiske informacije, kak móhła samopostajowana zamołwitosć za kubłanje fungować. Wuslědk bě wuprawa do wuchodneje Belgiskeje. Tam němskorěčne zhromadźenstwo z jemu přisłušacymi dźewjeć komunami kubłanje organizuje. Wobdźěleni Serbja měnjachu, zo měli čerstwe dopóznaća w šěršim kruhu zajimcow a zamołwitych rozjimać.