Gymnaziasća so ze žiwjenjom ludźi w zažnej kamjentnej dobje zaběrali

Miłoćicy (SN/MiR). Dohromady 60 šulerjow 5. lětnika Budyskeho Serbskeho gymnazija zaběra so wot srjedy hač do dźensnišeho intensiwnje ze zažnej kamjentnej dobu. Hačrunjež mamy w našej kónčinje z tohole časa jeno mało swědkow, je so tema na gymnaziju na cyle praktiske wašnje do kubłanskeho poskitka zapřijała. Lětsa je sej kubłanišćo za to partnera pytało: towarstwo „Kamjenjak“. W Miłočanskej skale „Při Krabatowym kamjenju“ zeznachu šulerjo na wjacorych stacijach žiwjenje ludźi něhdy. „Tutón kubłanski modul hižo wjacore lěta přewjedźemy. Je pak to prěni króć, zo smy sej partnera pytali. Dotal smy šulerjam wědu pola nas we wučbje na gymnaziju posrědkowali“, rjekny wučerka Judith Smolina. Čłonojo towarstwa běchu so na wopyt přihotowali. Lukaš Delenk dźěći serbsce powita a předstaji jim towarstwo.