Wodowe Hendrichecy (SN/MG/jp/klb). „Pój mjetaj!“ „Ně, mjetać njeje dowolene!“ Plač. Iiiiiii! Kupjel we Wodowych Hendrichecach je napjelnjena z harowacymi dźěćimi. Je ćopło, perfektne lěćne wjedro.

Tež 63 serbskich dźěći je sej wčera ze swojimi dohladowarjemi do kupjele wulećało. Poprawom kóždy dźeń wone tu su. Štož pak je tutu srjedu hinak: Za kupanjom a hejsowanjom chowaja so derje přemyslene nadawki. Wumyslił je sej tute 21 lětny Adrian Mička. Wón studuje w Lipsku wučerstwo za sport a biologiju. Za njeho je sportowy dźeń w kupjeli reminiscenca na swójske dźěćatstwo. Sam bě hustohdy sobu do „Seife“ jěł. Nětko chce dźěćom něšto wróćo dać. Za to je sej nadawki přemyslił, kotrež njeměrja so jenož na fyziske kmanosće dźěći, ale tež tajke, kotrež so na měrkuš měrja. Tak twarja dźěći nětko pěskowe hrody, čerpaja z pomocu hubicow wodu a wuslědźa, što z nich najdlěje nurić móže. Dohromady šěsć stacijow je sej student tak nadźěłał.