Staršich njespokoja: Serbska rjadownja z přewažnje rěčnje měšanej wučbu

Budyšin/Kamjenica/Radwor (SN/mb). Serbska rjadownja 1. lětnika na Radworskej zakładnej šuli drje najprjedy někak eksistuje. Kaž pak so wona konkretnje zrjaduje, njeje jenož z wida potrjecheneje serbskeje maćerje Kristiny Rječkec „makulatura“. Krajny zarjad za šulu a kubłanje (LaSuB), kultusowe ministerstwo a wjednica šule su drje wčera popołdnju wo naležnosći rozsudźili. Po wotumje šulskeje konferency spočatk šulskeho lěta za wutworjenje serbskeje rjadownje ze sydom šulerjemi a dalšeje rjadownje z dwaceći dźěćimi, kaž bu to staršim do prózdnin oficielnje zdźělene, běše wotmołwa LaSuB: Doskónčny rozsud budźe za dwě njedźeli. Zarjad chcyše serbsku rjadownju ze znajmjeńša pjeć dalšimi šulerjemi „napjelnić“. Tomu najprjedy njebudźe, ale po wčerawšim staršiskim wječorku je nam Kristina Rječkec zdźěliła, zo to jenož za předmjetaj serbšćinu a matematiku płaći.