We Wodowych Hendrichecach wotměwa so tele dny 58. olympiada serbskeje rěče. 93 šulerkow a šulerjow 6. lětnika z dźesać serbskich šulow Hornjeje, srjedźneje a Delnjeje Łužicy dopokazuje tam swoje rěčne kmanosće a swoju wědu­.

Wodowe Hendrichecy (SN/CeK). „Pčołka a jeje wužitk“ je hłowna tema lětušeho wubědźowanja. Při tym njewojuja wobdźělnicy jenož wo najlěpše myta, ale dožiwjeja tež zhromadny program kołowokoło serbskeje rěče a kultury.

Po tym zo běchu serbšćinarjo wčera do Wodowych Hendrichec dojěli, jich w mjenje Serbskeho šulskeho towarstwa (SŠT), kotrež wubědźowanje zarjaduje, jeho předsydka Katharina Jurkowa kaž tež městopředsyda Jan Rjeda wutrobnje witaštaj. Přeještaj jim za přichodne dny wjele wuspěcha a wjesela. Po tym so šulerjo a šulerki do skupinow rozdźělichu, w kotrychž za čas olympiady hromadźe dźěłaja.