Budyšin. Na Serbskim gymnaziju Budyšin su minjeny tydźeń lětuši modulowy tydźeń přewjedli. Zwonka regularneje wučby dźěłachu šulerjo a šulerki na wubranych temach, slědźachu, diskutowachu a wuknjechu. Po tutym puću su stawizny, kulturu a towaršnosć na wosebite a nazorne wašnje dožiwili.

Brunica bě tema šulerkow a šulerjow 5. lětnika. Najprjedy zaběrachu so z nastaćom a wužiwanjom łužiskeje surowizny. Wosebje jimacy běše za nich wopyt wuhloweje jamy, w kotrejž brunicu přepytowachu a smědźachu sej samo kruchi wuhla sobu wzać. Zdobom rozestajachu so wuknjacy z wotbagrowanymi serbskimi sydlišćemi. Zhonichu wo hłuboko sahacych sćěwkach wudobywanja brunicy za Łužicu a wosebje za serbsku ludnosć. Srjedu wopyta šulerjow Slepjanska fararka Jadwiga Malinkowa. Wona rozprawješe dźěćom wo sćěhach strukturneje změny, kiž njeje hišće zakónčena.