Na Worklečanskej wyšej šuli su projektowy dźeń přewjedli

Worklecy (SN/MiR). Dojutrowny projektowy dźeń na Worklečanskej wyšej šuli „Michał Hórnik“ je so wulkotnje poradźił. Wšitcy šulerjo kaž tež wučerjo kubłanišća buchu při tym do wulkeho cyłka zapřijeći. Nalětni kubłanski dźeń je na tymle kubłanišću mjeztym hižo z dobrej tradiciju.

Prěni króć je poskitk lětsa wučerka Katrin Čornakec přihotowała, kotraž na naprašowanje Serbskich Nowin rjekny: „Při přihotach sym so na nazhonjenja kolegowkow a kolegow zepěrać móhła. Woni su mi z dobrej radu poboku byli.“ Na zahajenju na šulskim dworje rjekny šulska nawodnica Diana Šołćina: „Wjeselu so, zo sće wšitcy z wulkej motiwaciju na nalětni projektowy dźeń přišli. Sym sej wěsta, zo změjemy jara rjany a wuspěšny dźeń połny kreatiwnych idejow, zaběrajo so z nalěćom, z přirodu a nowym započatkom. Wzmiće sej za swój přichod sobu, štož w běhu poskitkow zhoniće.“ Tónle pokiw šulerjo a šulerki přiwzachu a poskitki, hač w šulskim twarjenju abo pod hołym njebjom, čile wužiwachu.