Nětko tež w Delnjej Łužicy wučerjow za delnjoserbšćinu wukubłuja

Choćebuz (SN/MiR). Lětsa nazymu, ze zahajenjom zymskeho studijneho semestra 2026/2027, zahaja na Braniborskej techniskej uniwersiće nowy studijny poskitk. Uniwersita a Serbski institut stej zhromadnje studijny porjad a module z wobsahami za bachelorowy dualny studij wučerstwa za delnjoserbšćinu za zakładne šule přihotowałoj. Zajimawa bě zašły pjatk zdobom informacija, zo njebudu so ze serbskej rěču a kulturu jenož zajimcy za tónle směr zaběrać. Wšitcy studenća wučerstwa maja přichodnje we wobłuku swojeho wučerskeho studija na BTU dohlad do stawiznow a přitomnosće łužiskich Serbow dóstać.