Wo dźěle Michała Hórnika zhonili a na slědach Jurja Wićaza pućowali

Praha (SN/LuNo). Studenća sorabistiki Lipšćanskeje uniwersity a Drježdźanskeje Techniskeje uniwersity su so minjeny kónc tydźenja wospjet ze studentami serbšćiny z Praskeje Karloweje uniwersity zešli, tónraz w Praze w tamnišim Serbskim seminarje. Tute, lětsa druhe zeńdźenje je wědomostnica, lektorka serbšćiny w Praze a awtorka hornjoserbsko-čěskeho słownika „Mudra 2.0“ Katja Brankačkec organizowała.

Pjatk popołdnju wopytachu studenća Sakski kontaktny běrow w čěskej stolicy. Jeho direktorka Josefina Ofner pokaza jim rumnosće zarjada a informowaše wo jeho stawiznach a prioritach skutkowanja. Skupina so za dźěło běrowa zajimowaše a zdobom zhoni, kak pomha saksko-čěske poćahi pohłubšeć. Potom powita hosći městopředsydka Towarstwa přećelow Serbow (SPL) Eliška Oberhelová. Wona rozprawješe wo wuwiću Hórnikoweje serbskeje knihownje a pokaza hosćom jeje ponowjene drohoćinki, předewšěm zwjazki Serbowki, studentskeho towarstwa Serbskeho seminara.