Něhdźe 180 šulerjow a šulerkow so na slědy sławneho spisowaćela podało

Budyšin (SN/MiR). Sławny spisowaćel Serbow Jurij Brězan je so před 110 lětami, 9. junija 1916, we Worklecach narodźił. Na to Domowina spomina, wěnujo jemu dźensa a jutře dopołdnja wosebitej projektowej dnjej ze šulerjemi. Při tym njeńdźe wo to, hólcam a holcam cyły žiwjenski skutk Brězana předstajić, skerje wone někotre jeho twórby zeznaja, dźiwadłowy kruch dožiwja a wo jeho žiwjenju a tworjenju zhonja. Zdobom maja něhdźe 180 šulerjow na wosom stacijach wšelake nadawki spjelnić. Na žurli Budyskeho Serbskeho doma běchu so dźensa rano šulerjo a šulerki 7. lětnika z wyšich šulow Kulow, Radwor, Ralbicy, Worklecy a Budyšin zešli. Regionalna rěčnica w Kamjenskej župje „Michał Hórnik“, Katharina Jurkowa rjekny: „To je přesahowacy projekt Budyskeje, Kamjenskeje a Wojerowskeje župy. Nam je wažne, šulerjam našich serbskich wótčincow zbližić, dokelž wěmy, zo njeje to w šulskej wučbje stajnje wobšěrnje móžno.“ Jutře rano podadźa so dalši šulerjo 7. lětnika z Radworja kaž tež serbscy gymnaziasća z Budyšina na slědy Jurja Brězana.