Kultusowy minister Sakskeje Conrad Clemens (CDU) je na parlamentariske naprašowanje nastupajo přichodny 1. lětnik Radworskeje šule wotmołwił. Zapósłanča Franziska Schubert (Zeleni) bě pjeć prašenjow zapodała.
Radwor/Drježdźany (SN/mb). Nastork za iniciatiwu hornjołužiskeje předsydki frakcije Zelenych w Sakskim krajnym sejmje bě rozsud Krajneho zarjada za šulu a kubłanje (LaSuB), na Radworskej serbskej zakładnej šule w šulskim lěće 2026/27 w 1. lětniku jenož jednu rjadownju wutworić. To woznamjenja, zo nimatej dwě třećinje šulerjow dosahace rěčne znajomosće za běžnu serbsku komunikaciju, kaž Franziska Schubert w předsłowje swojeho małeho naprašowanja zwěsći (dokument a wotmołwa stej na internetnej stronje archiwa „edas“ Sakskeho krajneho sejma 8. wólbneje doby pod čisłom 7187 přistupnej). Zdobom bě po dotalnych informacijach dwělomne, zo přichodna rjadowniska wučerka serbšćinu dosć derje wobknježi.
