Antifa: Direktorku gymnazija pušćić! Böhmer: Integerna wosobina

Budyšin/Drježdźany (SN/mb). Karsten Vogt (CDU), nětčiši Budyski wyši měšćanosta, nawjedowaše połdra lětdźesatka Philippa Melanchthonowy gymnazij, doniž njebu do radnicy zwoleny – wot tohole časa pytachu za naslědnikom. Loni w nalěću bě tak daloko: Monika von Broen, dotalna wjednica wyšeje šule dr. Salvadora Allende, měješe nadawk přewzać. Njedźelu třěleše skupina Antifa Elbflorenz z přinoškom na Instagramje a nastawkom na swojim blogu nastupajo tutu personaliju „bombu“ do Budyšina: „Ekstremnje prawicarska wučerka dźěła jako nawodnica gymnazija w Budyšinje.“ Krótko po tym bě wjac hač 30 000 likeow a tysac komentarow. Kubłanskopolitiska rěčnica Lěwicy w sakskim krajnym sejmje Luise Neuhaus-Wartenberg wobroći so z naprašowanjom na krajne knježerstwo Sakskeje – pod hesłom: „Ekstremnje prawicarjo na sakskich šulach“.