Budyšin/Chrósćicy (SN/MiR). Hanka Wowčerjowa přewza wot 1. awgusta 2026 poziciju direktorki šule w Chrósćicach. „Móžemy wobkrućić, zo su na serbskich zakładnych šulach w Budyšinje, Ralbicach a Chrósćicach wot 1. awgusta 2026 změny nastupajo wobsadźenje šulskeho nawodnistwa“, rěčnik krajneho zarjada za šulu a kubłanje Clemens Arndt po informacijach z Budyskeho stejnišća LaSuB dźensa na naprašowanje Serbskich Nowin zdźěli.

Dołho njebě so kmany požadar resp. požadarka za městno nawodnicy abo nawody Serbskeje zakładneje šule „Jurij Chěžka“ w Chrósćicach namakał, a to ani po wospjetnym wupisanju nic. „W poslednim wuzwolenskim procesu pak je so to poradźiło“, informuje Clemens Arndt po zakónčenju wobsadźenskeje procedury.