Nakładnistwo chce šulerjow za literaturu zahorjeć

Budyšin (SN/MDź). Pod titulom „Čas“ wuda Ludowe nakładnistwo Domowina lětsa hižo šestu knihu, nastawaca w kooperaciji ze serbskimi šulemi. Serbscy šulerjo 9. lětnika Serbskeho gymnazija Budyšin (SGB) změja móžnosć jónkrótny dohlad za kulisami nakładnistwa dóstać a jako rjadowniski cyłk swójsku serbsku knihu zhotowić. We wobłuku wučby serbšćiny a wuměłskeho kubłanja stawaja so ze šulerjow a šulerkow młodźi awtorojo a ilustratorojo swójskich stawizničkow. Hač pisanje basnje abo krótkopowědančka, ilustrowanje, design abo wabjenje – we wobłuku projekta zeznaja šulerjo z přewodom wučerjow Metoda Šołty, Judit Škodźineje a Hagena Kambacha kaž tež lektorki Marije Clausenoweje wšitke kroki zhotowjenja knihi. Při marketingu za knihu podpěra šulerjow sobudźěłaćer LND Dušan Šołta, hłownu zamołwitosć při rozšěrjenju a zhotowjenju pak přewozmu šulerjo přewažnje sami.