Studijo Liška medijowu turu po serbskich wjeskach zahajiło

Pěskecy (SN/hn/CeK). Z nowej generaciju dale kročić a nic w starym swěće stejo wostać – to je za mnohich wuměnkarjow wšědnje wužadanje. Mjeztym zo dźensniši młodostni swět bjez digitalnych nastrojow ani njeznaja, bě za staršich ludźi wulke přewučenje, zo móhli ze šmóratkom z wnučkami chatować abo na přećelku zazwonić. Zo bychu tutón zadźěwk lóšo přewinyli, poda so studijo Liška ze Smjerdźaceje tele dny wosobinsce k potrjechenym wuměnkarjam.

Wot wčerawšeho su sobudźěłaćerjo z bydlenskim mobilom a wulkim awtom w Pěskecach a přeprošuja tam wšěch zajimcow, sej serbski swět medijow wotkryć. Dwaj tydźenjej ma medijowa tura po Łužicy trać. Kak serbšćina poprawom digitalnje funguje? A kak móžeš ju tež na šmóratku, laptopje a druhich digitalnych nastrojach wužiwać?