Hladanje serbskich dźěći w Drježdźanach steji na hračkach

Drježdźany/Budyšin (SN/StŠ). „Jeli pjenjezy na kajkežkuli wašnje njenazběramy, potom dyrbimy swoju Drježdźansku serbsku dźěćacu skupinu zawrěć. Na tutón scenarij pak scyła myslić resp. sej jón předstajić nochcu. Ale tónle fakt słuša cyle jednorje k sprawnosći“, takle předsydka Serbskeho šulskeho towarstwa (SŠT), Ka­tharina Jurkowa, w rozmołwje situaciju wopisuje, w kotrejž serbska dźěćaca skupina na Čěskej hasy čisło 27 w Drježdźanach runje tči. Problem je, zo wobsteji skupina, po tym zo běchu tři dźěći kónc awgusta regularnje do pěstowarnje wotešli, tuchwilu jeničce z dweju dźěsći a kubłarki Sabiny Wagneroweje. „To pak njedosaha, zo bychmy wudawki za bydlenje a zahrodu wosrjedź noweho města, kaž tež za połnje přistajenu wosobu zarunać móhli. Smy sami jenož towarstwo, štož woznamjenja, zo nimamy žanežkuli dochody. Zo bychu so dochody a wudawki skupiny w Drježdźanach wurunali, je pjeć dźěći trjeba. Dokelž pak stej tam tuchwilu jenož dwě, wučinja deficit lětsa něhdźe 30 000 eurow“, tak Jurkowa.