Při kopańcy je trenar wažna wosobina, wšako wón wuspěch abo njewuspěch prěnjorjadnje zamołwja. Nimo praweje zestawy a taktiki měł trenar tež přeco prawe słowa namakać. To pak tak lochko njeje. Wšako ma kóždy hrajer swójski charakter. Tuž je jara wažne, kak ze swojimi chowancami komunikuješ, a to hižo na polu juniorow.
Młode koparske talenty přez wotměnjawy a na starobu wusměrjeny trening motiwować je po měnjenju Tadeja Cyža, nawody koparjow-juniorow Jednoty Kamjenc, jedyn z najwažnišich nadawkow trenarjow dorosta. Při tym měli sej nazwučowarjo tež přeco prawje přemyslić, kak ze swojimi chowancami rěča. Słowa kaž „Jeli dźensa troje wrota docpěješ, dóstanješ pjeć eurow!“ njejsu po jeho měnjenju jara wunošne za dźěći, znajmjeńša dołhodobnje nic. Koparki a koparjow w prawym wokomiku chwalić a při njewuspěchu zhromadnje za móžnosćemi polěpšenja pytać, to je dobry zakład wuspěcha a wjesela při kopańcy.