Ralbicy (aha/SN). K mało wjesnym hosćencam w Delanach słuša tón Šołćic swójby w Ralbicach. Po přewróće Pawoł Šołta z mandźelskej Marju wo tym rozmyslowaše, na městnje swójskeho zahrodnistwa natwarić kehelernju. Spočatnu wiziju zwoprawdźić wšak wopokaza so jako wulke wužadanje. Bjez spěchowanskich srědkow daštaj so do dźěła, a tam, hdźež stejachu wot lěta 1981 rostlinarnje, natwarištaj modernu kehelernju z dwěmaj čaromaj. Na městnje něhdyšeje hródźe nasta přijomnje wuhotowana hóstna stwa, kotrejž přizamkuje so swjedźenska stwa za něhdźe 50 ludźi. Po dźěłapołnymaj lětomaj móžeštaj wonaj krótko do hód 1999 prěnich hosći witać. Bě to lajska dźiwadłowa skupina Šunow-Konjecy, kotraž swoju adwentničku swjećeše. Spěšnje rozšěri so powěsć, zo móžeš w nowym Ralbičanskim hosćencu derje pojěsć a so zabawjeć. Marju Šołćinu sej mjeztym jako wuběrnu kucharku chwala, hdyž swjeća tam slěborny abo złoty kwas, narodniny a dalše swjedźenje.