Kulowske „Stare dwórnišćo“ njebudźe hižo hosćenc

Kulow (AK/SN). Šulski hort za wšitke wot Křesćansko-socialneho kubłanskeho skutka w Kulowje zastarane dźěći chce město w bywšim „Starym dwórnišću“ zaměstnić. Tam ma hač do 125 městnow nastać. „Tak bychmy komunalne twarjenje dołhodobnje a zmysłapołnje wuži­wali“, podšmórny měšćanosta Markus Posch (CDU) na wčerawšim posedźenju měšćanskeje rady.

Zrodźili su ideju z nuzy. Njenadźicy bě korčmar „Stareho dwórnišća“ wotnajenske zrěčenje z městom 12. meje priwatnych přičin dla wupowědźił. „Něšto dnjow pozdźišo chcychmy próstwu wo spěchowanske srědki za planowany nowotwar horta ze 60 městnami zapodać“, rozłoži Posch. „Dyrbjachmy krótkodobnje reagować a smy hromadźe z krajnoradnym zarjadom za hort hinaše rozri­sanje našli.“ Spěchowanske srědki – spočatnje myslene za nowotwar horta – wužiwaja­ nětko za přetwar „Stareho dwórnišća“, hdźež chcedźa mjez druhim tepjenje a sanitarne připrawy ponowić. Za swójbne swjedźenje a zarjadowanja rady wužiwana žurla wostanje.