To bě hižo štwórty dźěćacy a młodźinski camp, kotryž su zawčerawšim, njedźelu, při Kulowskim cyhelowym haće zakónčili. Sydomnaće holcow a hólcow móžeše so tam tři dny wudźenju wěnować.
Kulow (HH/SN). Samo nócne wudźenje z wobswětlenjom, grilowanski wječor ze wšěmi móžnymi wudźenskimi pryzlemi, zhromadny přihot a warjenje gulaša w kotole, wudźenska teorija jako dalekubłanje, małe płuwanske wubědźowanja a wudźenje bjez kónca. To bě lětuši dźěćacy a młodźinski camp wot 22. do 24. julija pod nawodom Kulowskeho wudźenskeho towarstwa hromadźe z Wojerowskim towarstwom „Hechtgeschwader“. Wot Ronnyja Mrosacka a Stephana Paula – wonaj staj w Kulowje a Wojerecach za młodych wudźerjow zamołwitaj – je zhonić, zo měješe lěhwo hnydom wjacore zaměry. „Zwjazujemy tak teoriju z praksu. Lěpšina při tym je, zo móža wobdźělnicy to nawuknjene hnydom nałožować. Nimo toho móžachu so hišće raz za tym a tamnym woprašeć, štož zrozumili njejsu“, Ronny Mrosack rozkładuje. „Na třoch dnjach je so towarstwo skrućiło. A přiběrała je česćownosć před přirodu, w kotrejž so pohibujemy“, Stephan Paul dodawa.
