Čěski dźěćacy chór Campanella přijědźe do Łužicy

štwórtk, 25. awgusta 2016
artikl hódnoćić
(0 )
Posledni lětuši hrodowy koncert w Njeswačidle wuhotuje 3. septembra čěski dźěćacy chór Campanella.  Foto: chór Campanella Posledni lětuši hrodowy koncert w Njeswačidle wuhotuje 3. septembra čěski dźěćacy chór Campanella. Foto: chór Campanella

Njeswačidło (LR/SN). Na lětuši třeći hrodowy koncert přeproša Njeswačanske towarstwo přećelow kultury a domizny sobotu, 3. septembra, do tamnišeho hrodoweho parka. To budźe zdobom posledni w rjedźe lětušich hrodowych koncertow. Wjeselić smědźa so wopytowarjo na znaty dźěćacy chór Campanella z čěskeho Olomouca. W lěće 1967 běštaj jón Karel Klimeš a jeho syn Jiří załožiłoj. Wot toho časa je chór něhdźe 1 200 króć w 45 krajach Europy, Azije, Afriki a Ameriki koncertował. Před dwanaće lětami bě spěwne ćěleso hižo raz hósć w Njeswačidle, štož bě tehdy wulke dožiwjenje.

W lěće 2013 wotmě so w chórje generaciska a strukturna změna. Při tym nasta Wuměłska zakładna šula Campanella Olomouc. Solistaj chóra Michaela Dvořáková a Jan Vaculík staj pedagogaj tuteje šule a zdobom čłonaj Morawskeho dźiwadła Olomouc.

Koncert wotměje so pod hołym njebjom před Njeswačanskim hrodom. Započatk budźe we 18.30 hodź. Zastupne lisćiki w předpředani poskića přichodnu njedźelu na hrodźe, wšědnje w Njeswačanskim časnikowym wobchodźe na Budyskej a w turistiskej informaciji w parku, wězo tež při wječornej kasy.

wozjewjene w: Łužica
Prošu přizjewće so, chceće-li komentar podać

Serbska debata

nowostki LND