Na swoje 30lětne wobstaće zhladuje tele dny Njebjelčanske towarstwo plahowarjow nuklow. Při tutej składnosći wuhotuja woni njedźelu, 18. septembra, na Mayerec statoku přehladku swojich štyrinohatych lubuškow.
Njebjelčicy (HS/SN). 20. februara 1986 zetka so w Njebjelčanskim hosćencu „Ke kastaniji“ wosom załoženskich čłonow noweho towarstwa plahowarjow nuklow. Wjetšina z nich bě do toho w Chróšćanskim towarstwje swój hobby wukonjała. Na čoło štyriwosoboweho předsydstwa wuzwolichu Měrćina Krawžu. Wot lěta 1996 Pěskečan Achim Weclich towarstwo nawjeduje. Wot něhdyšich załoženskich čłonow su dźensa hišće třo aktiwni. Wšitcy plahuja bjezwuwzaćnje rasowe skoćata. Alfons Nowak na přikład zaběra so hižo na wšě 30 lět jeničce z družinu nuklow durinske gamsbarbne.