Serbska nawigaciska app přistupna

srjeda, 05. oktobera 2016
artikl hódnoćić
(0 )

Budyšin (juny/SN). Serbski nawigaciski system je dźensa wušoł. Z najnowšej wersiju nawigaciskeje aplikacije „Osm­And“­ maja zajimcy prěni raz serbsku kartu za smartfony a tablety k dispoziciji. App wužiwa material njekomercielneho wote­wrjeneho projekta OpenStreetMap.

Nimo serbskich pomjenowanjow městow a wsow poskića app Serbam dalšu lěpšinu. Prěni króć je móžno, sej serbsku jako kartowu a nawigacisku rěč wuzwolić. Tak móža Serbja wotnětka w swojej maćeršćinje po Łužicy nawigěrować. Starali su so wo to njeličomni dobrowólni pomocnicy, kotřiž běchu karty cyłeje Łužicy we wólnym času do serbšćiny přełožili.

Serbska karta so při tym na dźensniše serbskorěčne kónčiny njewobmjezuje, ale wopřijima cyły sydlenski rum kaž tež gmejny zwonka njeho, kaž na přikład južnje Budyšina abo wuchodnje Łužiskeje Nysy. Žórła pomjenowanjow w tychle kónčinach běchu mjez druhim słowniki Arnošta Muki, Jakuba Krala a Filipa Rězaka. Tak hodźi so tež něhdyši serbski kraj znowa wotkrywać. Při tym maš přeco móžnosć, so k němskej abo pólskej karće wróćić. W pytanskej funkciji móžeš wězo tež serbske pomjenowanja wsow a pućow namakać.

Móžno dotal hišće njeje wužiwarski powjerch programa zeserbšćić, dokelž system Android rěčne kody z třomi pismikami – kaž „hsb“ za hornjoserbšćinu – njeakceptuje. Na prěni dospołny serbski nawigaciski system, kotryž potom tež w maćeršćinje z nami rěči, dyrbimy potajkim hišće chwilku čakać. W mjezyčasu móžemy ze serbskej app po Budyšinje, Delanach abo Błótach pućować.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND