Saněrowanje spušćadła w Delnim Wujězdźe so dliji

pjatk, 14. oktobera 2016
artikl hódnoćić
(0 )

Delni Wujězd (AK/SN). Srjedź oktobra chcychu w Delnim Wujězdźe Sprjewju zaso napjeć. Generalne saněrowanje spušćadła so tam wot kónca februara po planje­ realizowaše, dźěłaćerjo njeběchu w zastatku. Potom pak nańdźechu na betonowych stołpach njenadźicy přeco zaso dźěry. „To bě wosebje we wobłuku, kotryž je hewak přeco pod wodu. Z tajkimi překwapjenkami dyrbiš při nuznym saněrowanju přeco ličić. W tutej wulkosći njeběchu problemy spóznać“, praji Mechthild Lehmann, wjednica projekta Sprjewine spušćadło při krajnym zarjadnistwje rěčnych zawěrow Sakskeje, zawod Sprjewja/Nysa sewjer. Tute jako twarski knjez naprawu, generalne saněrowanje tež zamołwja. Projekt něhdźe 2,3 miliony eurow płaći. Swobodny stat Sakska to stoprocentnje financuje.

„Na sewjernym kóncu spušćadła mamy lětsa hišće najwjace dźěła“, Mechthild Lehman dale podšmórny. Dźěry su hižo swědomiće ze wšelakimi maćiznami zapłatane. 18 metrow dołhi a 27 metrow šěroki dźěl spušćadła, w kotrymž so woda na energiju přetwori, je hižo betonowany. Spušćadłowe klapy zaso zatwarichu. Tež ćěrjenje je montowane. Zatwarić ma so tež specielne tepjenje. Z tym ma so zadźěwać, zo připrawa při lódzymnych temperaturach njezamjerznje, zo móža ju tež při krutej zymje pod nulu njekomplikowanje wužiwać.

Tuchwilu saněruje Budyska firma BauCom spušćadłowy móst. Kaž za cyły projekt zamołwity Łazowski wodźiznowy management zdźěli, ma cyłkowne saněrowanje hač do kónc lěta zakónčene być. Po tym so probowe zahaćenje započnje. Sprjewja so zaso do swojeho hłowneho rěčnistwa wróći.

Komdźenja saněrowanja wubudźichu pola wobydlerjow wulke zadźiwanje. Mnozy so prašachu, čehodla tomu tak je. Wšako chcedźa Delnjowujězdźenjo klětu swój wulki jubilej „675 lět Wujězd/Sprjewja – swjećimy ze susodami a hosćimi“ hódnje woswjećić. Jako swjedźenišćo chcedźa tež ludowy park a sprjewinu kupu zapřijeć. To budźe tež móžne.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND