Při najrjenšim nazymskim wjedrje swjećachu wčera wokoło Wotrowa a klóštra Marijineje hwězdy swoju kermušu.­ Na klóšterskim dworje je mały­ hermank předewšěm swójby z dźěćimi přićahował.

Wotrow/Pančicy-Kukow (aha/SN). Poprawom mějachu wčera ewangelscy serbscy wěriwi w Hornim Wujězdźe, Korzymju a Chwaćicach kermušu. Bohužel pak so tam tónle swjedźeń tak zachował njeje kaž w katolskich serbskich wosadach. Lětuši cyklus kermušow so 28. awgusta we Wósporku zahaji a na dalšich njedźelach w dohromady 399 wsach a městačkach slěduja kermušne hosćiny.