Angažuja so za hrodowy park

wutora, 18. oktobera 2016
artikl hódnoćić
(0 )
Delnjowujězdźanske domizniske towarstwo je minjenu sobotu wobydlerjow namołwjało, při rjedźenju hrodoweho parka pomhać.  Foto: Jost Schmidtchen Delnjowujězdźanske domizniske towarstwo je minjenu sobotu wobydlerjow namołwjało, při rjedźenju hrodoweho parka pomhać. Foto: Jost Schmidtchen

Mjeztym hižo šesty parkowy seminar w Delnim Wujězdźe je minjenu sobotu mnohich dobrowólnych pomocnikow zjednoćił. Zhromadnje su tam tójšto zdokonjeli.

Delni Wujězd (JoS/SN). Hrodowe parki w Hornjej Łužicy trjebaja pomoc. Wuhlady na pjenježnu pomoc pak su zwjetša jara špatne. Tuž so wobydlerjo často sami gratu přimaja, tak kaž hižo něšto lět w Delnim Wujězdźe. Tam přewjedźechu minjenu sobotu mjeztym hižo šesty parkowy­ seminar pod fachowym nawodom Lipšćanskeje krajinoweje architektki ­Kathrin Franz. Z njej zmištrowachu wjacore trěbne hladanske naprawy. K tomu namołwjało bě Delnjowujězdźanske domizniske towarstwo. Cyły dźeń bě stajnje něhdźe 20 pomocnikow při dźěle, mjez nimi běchu tež młódši ludźo, štož swědči wo jich zwjazanosći z hrodowym parkom.

Hamorske gmejnske zarjadnistwo podpěraše akciju z techniku a přewostaji mały nakładowak a Multicar. Motyki, hrabje a łopaće běchu pomocnicy wotdoma sobu přinjesli. Předewšěm su při jednym z nowopřiprawjenych pućikow njerodź torhali, wosebje japanski wuroč (Knöterich). Něhdy su jón po wšej Němskej jako wozdobnu rostlinu sadźeli. Mjeztym pak je so wón tak jara roz­množił, zo so druhe rostliny wuwiwać njemóža. W Delnjowujězdźanskim hrodowym parku su hortensije pod tym chětro ćerpjeli. „Mjeztym pak je połoženje zaso trochu lěpše“, je Kathrin Franz wolóžena. Dale su sobotu štomiki při­třihowali, samoplahowane rododendronowe kerki wosadźeli a na wjacorych městnach trawnik wusyli.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND