Próstwje znowa njewotpowědowali

srjeda, 30. nowembera 2016
artikl hódnoćić
(0 )

Wotpohlad předewzaćela, twarić wo­srjedź lěsa na Kaponicy pola Radworja běrowowe a hospodarske twarjenje, we wsy tuchwilu diskusiju wuwabja. Na zašłym posedźenju gmejnskeje rady su radźićeljo próstwu znowa wotpokazali.

Radwor (SN/BŠe). Předewzaće Reclay Forest, kotrež ma swoje sydło w zapadoněmskim Herbronje, wobsedźi na Kaponicy 700 hektarow lěsa. Hajnik, kiž so wo lěs stara, ma swój běrow tuchwilu w Budyšinje. Zo móhł swoje dźěło porjadnje wukonjeć, a zo bychu mašiny za wobhospodarjenje hnydom na městnje byli, je nuznje hospodarske twarjenje trěbne. Kaž předewzaćel Martin Schürmann napřećo SN wobkrući, jedna so tu wo dom z běrowom, ze słužbnym bydlenjom, rumnosću za chłódźenje a gratownju we wobjimje něhdźe 130 kwadratnych metrow, kotrež ma na lěsnej łuce nastać. Twarjenje by transportnu logistiku njesměrnje wolóžiło. „Sym zwólniwy žadanjam wobswětoweho ministerstwa wotpowědować“, wón zwurazni. Wobmyslenja gmejnskich radźićelow njemóže tuž zrozumić.

Hižo na septemberskim posedźenju běchu Radworscy gmejnscy radźićeljo twarsku próstwu ze wšelakich přičin wotpokazali. Tak njeje po jich měnjenju zaručene, zo je wuchowanska słužba w padźe chorosće abo njezboža spěšnje dosć na městnje. K tomu słušeja tež wohnjoškitne směrnicy. Měsacaj pozdźišo mějachu nětko hišće raz wo naležnosći wuradźować. To wšak diskusiju wuwabja, njeběchu dźě próstwje hižo raz wotpowědowali. Přičina je tak mjenowane měšćanske zrěčenje – druha forma twarskeje próstwy, za čož je znowa stejišćo gmejnskeje rady trěbne. Tole pak komunalni zastupjerjo jednohłósnje wotpokazachu.

Kaž Martin Schürmann zdźěli, wón njewě, kak ma dale hić. Jeho zajim płaći lěsej, kotryž chce w prawej měrje wobhospodarjeć. Z lěsom wobsedźi předewzaćel tež puć přez njón – historisku staru dróhu –, kotryž wjedźe wot Łupoje na Kaponicu. Tón je na swójske kóšty zwuporjedźał z wuměnjenjom, zo gmejna zjawne wěnowanje zběhnje. Wobydlerjo pak zběraja tuchwilu podpisma přećiwo tomu, dokelž so boja, zo budźe puć potom zawrjeny a Kaponica jenož pěši přistupna.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND