Pruwowanski čas z wuměnjenjemi

wutora, 14. februara 2017
artikl hódnoćić
(0 )

Budyšin (SN). K jednomu lětu jastwa z pruwowanskim časom je Budyske hamtske sudnistwo wčera 20lětneho muža zasudźiło. Wumjetowachu jemu, zo bě so před lětom hromadźe ze znatymaj při wohenju w planowanym domje za požadarjow azyla w bywšim Budyskim hotelu „Husarenhof“ přikazam policije spřećiwjał.

Třo młodźi mužojo běchu w nocy na 21. februar 2016 přikaz policije, městno před hotelom „Husarenhof“ wopušćić, ignorowali. Při tym woni policistam wudma nadawachu a do nich storkachu. Nimo spřećiwjenja přećiwo zastojnikam dyrbješe so 20lětny tež wjacorych dalšich deliktow dla před sudnistwom zamołwić. Tak móžachu jemu dopokazać, zo bě so do zahrodowych domčkow zadobył a zo je njedowolene drogi wobsedźał. Młodźinski sudnik zasudźi jeho tuž k jednomu lětu jastwa z pruwowanskim časom. Z tym zwjazane su wšelake wuměnjenja. Tak dyrbi młody muž 300 hodźin powšitkownowužitneho dźěła wukonjeć a so wobstajnje na drogowym poradźowanju wobdźěleć. Wobskorženy njeje policiji njeznaty. Mjeńšich deliktow dla steješe wón hižo časćišo před młodźinskim sudnikom, štož wunjese dotal stajnje poroki a młodźinski arest. Jeli so tónraz na wuměnjenja njedźerži, póńdźe wón lěto do jastwa.

Znajmjeńša bě so 20lětny w procesu pola policajskich zastojnikow, na kotrychž bě wón při wohenju před hotelom hewrjekał, zamołwił. Jeho dweju kumplow je sudnistwo hižo loni w nowembru k wjacorym lětam jastwa zasudźiło, přećiwo čemuž staj wonaj rewiziju zapodałoj. Poprawom dyrbješe tež třeći wobskorženy te­hdy před sudnistwom stać. Wón pak prosće přišoł njeje. Tohodla bě sudnistwo přikazało jeho zajeć, a to je so w januaru stało. Wot toho časa sedźeše młody muž w přepytowanskej jatbje.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND