Ma noweho wobsedźerja

srjeda, 22. měrca 2017
artikl hódnoćić
(0 )

Dźensa na sudnistwje třeći raz Worklečanski hosćenc přesadźowali

Budyšin (SN/MWj). Wot dźensnišeho w 11.50 hodź. ma Worklečanski hosćenc „Při kupowym haće“ noweho wobse­dźerja, abo lěpje prajene dweju. Staj to bratraj Marcus a Henry Szczepaniak z Chrósćic. Wonaj staj při třećim nu­zowym přesadźowanju na Budyskim hamtskim­ sudnistwje z 62 000 eurami najwyši poskitk předpołožiłoj. Krótko do 12 hodź. bě čas poskićowanja nimo a sobudźěłaćer sudnistwa Andreas Amft zdźěli, zo je poskitk płaćiwy. Tež zastupjerjej Budyskeje Ludoweje banki jako wěrićelki staj jón přiwzałoj. Tak słuša hosćenc nětko Chróšćanomaj.

Hinak hač na zašłymaj terminomaj nuzoweho přesadźowanja dotalna mějićelka Marlies Hüllowa dźensa přijěła njeje­. Dokelž běchu na próstwu Ludoweje banki nuzoweho zarjadnika (Zwangsverwalter) zasadźili, je tón wčera we Worklecach z pomocu policije hosćenc za­wěsćił a durje zapječatował. To drje bě za dźensniše­ přesadźowanje njerozsudne, ma pak lěpšinu, zo móžetaj nowaj wobsedźerjej objekt nablaku přewzać.

wozjewjene w: Łužica
Prošu přizjewće so, chceće-li komentar podać

Serbska debata

nowostki LND