Z krótkimi programami hosći wabić

štwórtk, 23. měrca 2017
artikl hódnoćić
(0 )

Što mamy hinak činić, zo by zazběh lětušeho Mjezynarodneho folklorneho festiwala „Łužica“ 22. junija w Budyšinje wjace měšćanow na Hród wabił? Z podpěru města su změny planowane, festiwalny flair na Hłownym torhošću dožiwić móc.

Budyšin (SN/at). Šulerske předstajenja z hóstnymi skupinami na zahajenskim dnju Mjezynarodneho folklorneho festiwala „Łužica 2017“ w Němsko-Serbskim ludowym dźiwadle su wuknihowane. To rozprawješe čłonka přihotowanskeho wuběrka Katharina Jurkowa na njedawnym posedźenju dźěłoweho kruha za serbske naležnosće Budyskeje měšćanskeje rady. Tradicionalny ćah wobdźělenych ansamblow wot Žitnych wikow přez Hłowne torhošćo na Hród, městnosć zahajenskeho zarjadowanja, pak chcedźa lětsa hromadźe z nutřkoměšćanskim towarstwom tróšku hinak „přihotować“. Měnjena je přiležnosć, tež tudyše ćělesa dožiwić. „Na Hłownym torhošću chcemy rejwansku přestrjeń natwarić, hdźež so cyłki wot 13 hodź. z krótkimi programami ludźom předstaja“, Katharina Jurkowa rozłoži. Rěč njeje wo wulkim jewišću, ale wo tajkej pře­strjeni, kaž za wjesne reje pod hołym njebjom. Předawanišćo napojow móhło rejwansku płoninu wudospołnić. Tak chcedźa festiwalnu atmosferu přisporjeć cyłe popoł­dnjo Budyšanow kaž tež jich hosći za wopyt wječorneho zarjadowanja zahorić. Tuchwilu pruwuja, kotre tudyše cyłki hodźeli so za to zdobyć.

Cityjowa managerka Gunhild Mimuß namjetowaše, tam zdobom tež zastupne lisćiki předawać. Dalša jeje mysl bě shoppingowa nóc. Pobrachowaceje kupneje přiležnosće dla su wikowarjo to wotpokazali, rozłoži Mimuß čłonam dźěłoweho kruha. „Štwórtk jako wjeršk wuhotować je ćežko. Město měło so bóle prezentować“, da měšćanski radźićel Měrko Brankačk (Pegasus) k přemyslowanju. Wone dyrbi widźomnišo za festiwal wabić. Sobudźěłaćer měšćanskeho zarjadnistwa Wolfgang Zettwitz skedźbni na móžnosć witanskich taflow při dróhach na kromje města.

Jeli so poradźi mjez Budyšanami a jich hosćimi wćipnosć na pisany program budźić, by to festiwalej jara tyło.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND