Zetkanje z pólskim koloritom

srjeda, 24. meje 2017
artikl hódnoćić
(0 )
Kabaretny program Steffena Möllera bě jedyn z wjerškow 5. němsko-pólskeho zetkanja  „Majówka“ minjenu sobotu w Budyšinje.  Foto: Carmen Schumann Kabaretny program Steffena Möllera bě jedyn z wjerškow 5. němsko-pólskeho zetkanja „Majówka“ minjenu sobotu w Budyšinje. Foto: Carmen Schumann

Zamołwita za wukrajnikow Budyskeho wokrjesa Anna Piętak-Malinowska bě minjenu sobotu do Kamjentneho domu na 5. němsko-pólske zetkanje „Majówka“ přeprosyła.

Budyšin (CRM/SN). Přeprošeni běchu nimo wšěch we wokrjesu bydlacych Polakow předewšěm jich partnerojo kaž tež pólšćinu wuknjacy přećeljo. Wjele wjace zajimcow, hač běchu zarjadowarjo wočakowali, hižo dočasnje do sociokulturneho centruma dóńdźe. Na dworje domu so swjedźeń zahaji. Bórze so wujewi, zo so mnozy mjez sobu znaja a tuž njebě ćežko, starych a młodych kaž we wulkej swójbje do rozmołwy pohnuć a do zhromadneho spěwanja přeprosyć. Z přewodom keyboarda, gitary a huslow přitomni tak mócnje spěwachu, kaž to skerje ze serbskich swjedźenjow znajemy. A činjachu to jenož pólsce z pomocu wudźělenych łopjenow. „Poszła żabka po wodę“, „Za górami, za lasami“ a wězo tež pola nas jara znata pěseń „Szła dziewieczka do laseczka“ kaž tež dalše spěwy zanošowachu ludźo z wjele lóštom na rjanym mejskim wječoru. Prawa to „Majówka“.

Dźěći mějachu z kreatiwnym molowanjom pod nawodom Ellen Spengler wotpowědnu zabawu. Po pólskim hospo­dliwym wašnju bě w domje tohorunja bohaty­ bifej přihotowany. Podpěrane bu tele mjezynarodne zetkanje wot Budy­skeho krajnoradneho zarjada kaž tež wot Swobodneho stata Sakskeje.

Dawno připowědźeny program kabaretista Steffena Möllera na žurli domu hišće dalšich hosći přiwabi. Möller, kiž hižo 20 lět we Waršawje bydli a jara wuspěšnje tam tež w telewiziji wustupuje, słuša k najprominentnišim Němcam w Pólskej. Z tamnišeje stolicy běše wón swój kabaretny program „Moja třeća žona je Pólka“ sobu přinjesł. Bohužel ći posledni njemějachu šansy, na žurlu so dóstać.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND