Korjenjam a tradicijam swěrni

póndźela, 19. junija 2017
artikl hódnoćić
(0 )
Serbski ewangelski domizniski dźeń je so wčera w Sprjejcach a Nowym Měsće wotměł. Dwurěčnej bohosłužbje w Sprjejcach přizamkny so kulturny program při Sprjewi w Nowym Měsće, hdźež serbske kěrluše a pěsnje zaklinčachu.  Foto: Andreas Kirschke Serbski ewangelski domizniski dźeń je so wčera w Sprjejcach a Nowym Měsće wotměł. Dwurěčnej bohosłužbje w Sprjejcach přizamkny so kulturny program při Sprjewi w Nowym Měsće, hdźež serbske kěrluše a pěsnje zaklinčachu. Foto: Andreas Kirschke

Serbski ewangelski domizniski dźeń w Sprjejcach a Nowym Měsće wotměli

Sprjejcy (AK/SN). Z chlěbom a selu a narodnej drasće witachu wčera hosći dźe­sateho Serbskeho ewangelskeho domi­zniskeho dnja před Sprjejčanskej cyr­kwju. Bohosłužbu na to wobrubi Ži­dźinski chór. Pod hesłom z biblije „Žně su wulke, ale dźěłaćerjow je mało“ superintendent Jan Malink rozłoži, zo maja žně wjele wobličow. Žně su zdokonjane žiwjenje, cyrkwinske­ kaž tež kulturne. Woboje je w domizniskim dnju zjednoćene. Po słowach Malinka ma tónle dźeń wěru skrućić a hordosć na serbske korjenje budźić. „Serbja su wulke bohatstwo za cyrkwinski kruh kaž tež za krajnu cyrkej“, podšmórny generalny superintendent Martin Herche ze Zhorjelca w swojich postrownych słowach. „Žiwe tradicije w Serbach woznamjenjeja žiwu wěru.“ Tole začuwa wón runje tež we Wojerowskim regionje.

W Sprjejcach a Nowym Měsće so mnozy­ za domizniski dźeń angažowachu, mjez druhim starše žony, kotrež hižo­ wot ranja při hotowanju narodneje drasty pomhachu. „Zhromadnosć we wsy je wulka. W běhu lěta hajimy mnohe nałožki“, měnjachu Martina Halina, Ines Waschnikowa a dalše žony z Noweho Města.­ Popołdnju su wone w kulturnym programje sobu skutkowali.

Hudźbnje witała je hosći Grodkowska dujerska kapała. Wo swojim dźěle informowachu Grodkowska Domowinska skupina, towarstwo Nowoměšćanska přaza a zakładna šula z Noweje Wsy. Skupina­ Rownjanske glosy zanjese pěsnje w slepjanšćinje, a Nowoměšćanske domizniske towarstwo pokaza serbsku drastu wšědneho dnja. Kaž jeho předsyda Stefan Krawc rozłoži, přisłuša towarstwu 27 čłonow. Dźensa maja wobšěrny fundus narodneje drasty. Někotre z nich předstajištej młodostnej Scarlett Petowec a Juliane Krawcec. „Serbske korjenje su mi wažne“, rjekny Scarlett. W Nowoměšćanskej pěstowarni, na Slepjanskej zakładnej šuli a pozdźišo na Wojerowskim Lessingowym gymnaziju je wona serbšćinu wuknyła. Ale we Wojerowskim regionje serbsku rěč konsekwentnje wuknyć je ćežko, dokelž je lědma šule, hdźež je to móžno. Dołhodobnje je tuž wjele dźěłaćerjow trěbnych. Za to měješe prědowanje Jana Malinka sensibilizować.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND