při twarnišću

pjatk, 30. junija 2017
artikl hódnoćić
(0 )
Hdys a hdys Pančičansko-Kukowski pjekar Maik Zelnak na twarnišćo blisko swojeje pjekarnje pohladnje, kak daloko dźěłaćerjo tam su.  Foto: Marian Wjeńka Hdys a hdys Pančičansko-Kukowski pjekar Maik Zelnak na twarnišćo blisko swojeje pjekarnje pohladnje, kak daloko dźěłaćerjo tam su. Foto: Marian Wjeńka
Žiwy być
Wobhladuje połoženje jako šansu

Nowy móst nad Klóšterskej wodu a wutwar statneje dróhi S 100 w Pančicach-Kukowje je tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju chcemy twarnišćo přewodźeć a starosće tamnišich wobydlerjow wobswětlić.

Mjeztym połdra měsaca je statna dróha S 100 w Pančicach-Kukowje zawrjena. Ludźo su so na to zwučili, zo dyrbja zdźěla dosć dołhe wokołopuće na so brać. Tak tež pjekar Maik Zelnak, kiž pak ma hišće cyle hinaše starosće. Wón ma při swojej pjekarni napřećo klóštrej předawarnju a dalšu w kupnicy Netto a je takrjec dwójce wot twarnišća potrjecheny. „Dokelž bě hižo do toho wotwidźeć, zo ludźo w delnim wobchodźe nakupować móc njebudu, smy tule wot srjedź meje časy redukowali a začinjamy hižo w dźesaćich. To je někak čas, hdyž smy w pjekarni dodźěłali. Po tym zwožu wšitke twory do hornjeje předawarnje w Netto“, pjekar rozłožuje. Deleka žanu předawarku hižo nima, ale zwjetša sam twory předawa.

Wot prěnjeho dnja twarnišća Maik Zelnak registruje, zo ma wšědnje znajmjeńša 20 procentow mjenje wobrota, druhdy hišće mjenje. Kak chce to scyła na dlěši čas přetrać? „Sym sej do toho koncept zdźěłał, kak móhli tónle čas přetrać. Dyrbjach ludźi pušćić a na mnohich šrubach wjerćeć, hdźež hodźi so lutować. W pjekarni pak sym na to dźiwał, zo wostanjemy kruty zdónk. Tón chcu sej dale wobchować.“ Wězo móhł kóždy dźeń skoržić. Zelnak pak wobhladuje tuchwilne połoženje jako šansu, swój rjemjeslniski zawod na přichod wusměrić. Za to wón dźěłowe wotběhi optiměruje, měnja dźěłowe časy, přestrukturuje swój skład atd. „Hdyž tole wšitko funguje a moji ludźo sobu ćahnu, potom tele lěto přetrajemy“, je sej pjekar wěsty. Najbóle by jemu tuchwilu pomhało, by-li wón wot pjekarnje do hornjeje předawarnje krótši puć měł a njetrjebał-li stajnje wjacore kilometry wokołopuća jězdźić. Snano so tež to hišće zešlachći. Runje tak pak wón wě, zo po dotwarje znajmjeńša hišće lěto traje, prjedy hač budźe zaso wšitko při starym. Ludźo dźě so spěšnje na to zwuča, druhdźe nakupować.

Na twarnišću samym tuchwilu roły za dešćikowu wodu a wodowody kładu. Najwobšěrniše dźěło dotal bě wšitke medije we wobłuku mosta přepołožić. To nastupa wopłóčkowy kanal runje tak kaž njeličomne milinowody a dalše kable. Kaž Nicole Wernicke z krajneho zarjada za dróhotwar a wobchad zdźěli, započnu přichodnu póndźelu točenske dźěła za nowy móst přihotować. Za njón dyrbja dwanaće metrow hłuboke dźěry točić, kotrež na to ze železnej konstrukciju a betonom­ wupjelnja. Marian Wjeńka

wozjewjene w: Lokalka

Galerija

dalši wobraz (1)
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND