Płaćizny za hort wostanu samsne

pjatk, 30. junija 2017
artikl hódnoćić
(0 )

Nowowutworjeny hort w Njebjelčanskim dźěćacym dnjowym přebywanišću zaběraše wčera čłonow tamnišeje gmejnskeje rady. Po tym zo běchu so rozsudźili, swójski hort wu­tworić, je nětko tež jasne, kelko maja starši za njón płaćić.

Pěskecy (SN/MWj). Za přebywanje swojich dźěći w nowowutworjenym horće w Njebjelčicach změja starši runje telko płaćić, kaž hdyž bychu jich dźěći we Worklecach do horta chodźili. „Na te wašnje nima nichtó njelěpšiny z toho, zo jeho dźěćo do Njebjelčanskeho horta chodźi“, rjekny wjesnjanosta Tomaš Čornak (CDU) na wčerawšim posedźenju gmejnskeje rady w Pěskecach.

Krajny a wokrjesny młodźinski zarjad stej mjeztym přihłosowałoj, zo móža za 14 holcow a hólcow 1. lětnika w šulskim lěće 2017/2018 w Njebjelčanskej pěstowarni hort wutworić. Rjadować pak nětko hišće dyrbja, kak transport dźěći po šulskej wučbje z Worklec do Njebjelčic organizuja a kak tomu zadźěwaja, zo je tele jězdźenje z přidatnymi wudawkami zwjazane.

Wudawki za hort su na troje wašnje rozrjadowane. Wone wobliča so po tym, hač je dźěćo pjeć abo šěsć hodźin w horće, hač pochadźa ze swójby abo hač so jenož jedyn staršiski dźěl wo nje stara, a třeći kriterij je, hač chodźa ze samsneje swójby dalše dźěći do horta. Tak płaći swójba za pjećhodźinske hladanje swojeho prěnjeho dźěsća 55 eurow wob měsac, samostejaca wosoba za třeće dźěćo a samsny čas něhdźe dźesać eurow. Při šěsćhodźinskim přebywanju sahaja płaćizny wot dwanaće hač do 67 eurow.

Dale Njebjelčanscy gmejnscy radźićeljo wčera rozsudźichu, zo ma so wjesna předawarnja w twarjenju gmejnskeho zarjadnistwa wupisać. Wotnajer Michael Purschke bě starobnych přičin dla wupowědźił. „Wědźachmy, zo tónle dźeń raz přińdźe, nětko tu je. Ćim bóle so wjeselimy, zo mějachmy z knjezom Purschku dobreho drobnowikowarja“, rjekny wčera Tomaš Čornak. Wot 1. septembra budźe wobchod najprjedy raz prózdny. Z wupisanjom chcedźa nětko noweho wotnajerja namakać. „Nadźijamy so prawje wjele zajimcow, zo móhli so za najlěpšeho rozsudźić“, praji wjesnjanosta.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND