Z dopóznaćow za přichod wuknyć

póndźela, 10. julija 2017
artikl hódnoćić
(0 )
Čłonki Zjednoćenstwa přesćěhanych nacistiskeho režima  Foto: SN/Maćij Bulank Čłonki Zjednoćenstwa přesćěhanych nacistiskeho režima Foto: SN/Maćij Bulank

Budyšin (SN/MiR). Před domskim na Bohatej hasy 29 w Budyšinje skedźbnjeja kopolaki na dóńt něhdy tam bydlaceje swójby Grossmann. Dźensa je tomu dźesać lět, zo bě iniciator akcije „kopolaki“ Gunter Demnig z Kölna tam štyri tajke dopominanske kamjenje zapołožił. Tak je dopołdnja wjace hač 70 zajimcow zhromadnje z Budyskim wyšim měšćanostu Alexanderom Ahrensom (SPD) a čło­nami akciskeho kruha „Zetkanje ze židowstwom“ na něhdyšich židowskich wobydlerjow města spominało. „Chcemy so na zašłosć dopominać a z dopóznaćow za přichod wuknyć“, rjekny předsyda kruha dr. Peter-Paul Straube. „Sym sej wěsty, zo njeje so Němska hišće dosć rozestajała ze zaničowanjom židow a z kulturu tworjacymi. Přeprošam tuž k tomu, europsku zhromadnosć šěrić a rozdźěle narodow potwjerdźić“, rjekny Alexander Ahrens. Sobudźěłaćerka Budyskeho Serbskeho instituta Annalena Schmidt zwurazni: „Smy žiwi w času, w kotrymž so prawicarskopopulistiske a prawicarske myslenje šěri. Spominanje je dźensa tuž ćim wažniše.“

Při dalšim stejnišću na Křidarskej 2, hdźež sydom kopolakow na dóńt swójby Nussenbaum pokazuje, skedźbni dr. Ingrid Heyser na to, zo běchu so šulerjo swój čas intensiwnje z Budyskimi židowskimi stawiznami zaběrali. Něhdyša rěčnica města Elke Lorenz dopomni na to, kak běchu Budyšenjo tehdy nad prěnimi kopolakami stražowali. Mjeztym ma jich sprjewine město 34.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND