Wohnjowi wobornicy zarjadniskeho zwjazka so wubědźowali

Róžant (aha/SN). Wo pućowanski pokal zarjadniskeho zwjazka Při Klóšterskej wodźe wubědźowachu so minjeny pjatk mustwa wosom wohnjowych woborow a dalše tři młodźinske wobory.

Nawoda Róžeńčanskich wobornikow Frank Pjech staraše so tónkróć wo dobry wotběh wubědźowanja, štož hłowny sudnik Stefan Brückner z Dubrjenka chwalobnje hódnoćeše. Nimo Pjecha podpěrachu jeho Pětr Kokla, Manfred Kral a protokolantka Mariana Šnablec.

Na wšitkich wubědźowanskich městnach zarjadniskeho zwjazka wužiwaja wodu z wulkeho suda, w kotrymž je 10 000 litrow. Jeničce w Smjerdźacej bjeru­ wodu z rěčki. Kóžde mustwo, wobstejace ze sydom kameradow, dyrbješe tři B-hadźicy a dwě C-hadźicy po dołhosći 95 metrow wukłasć. Na to mějachu wobornicy z pjeć metrow zdalenosće přez 50 milimetrow šěroku dźěrku wodu pryskać, zo bychu dźesaćlitrowske sudobjo pjelnili. Młodźinske cyłki so po trochu hinašim modusu wubědźuja. Z 31,34 sekundami bě Pěskečanski dorost šěsć sekundow spěšniši hač młodźinske zastupnistwo Ralbic/Róžanta.