Kulow (UH/SN). Pjaty raz je so kónc tydźenja při Kulowskim měšćanskim haće młodźinski festiwal wotměł. Znowa bě towarstwo „United Clubs for Kulow“ zarjadowar tohole eventa a tež tónraz dopokaza, zo so něhdy koncipowana ideja z kóždym razom lěpje zwoprawdźa. „Naš klub je takrjec třěšny zwjazk najwšelakorišich Kulowskich młodźinskich towarstwow. My jich namjety a aktiwity koordinujemy a staramy so wo zawěsćenja a druhe naležnosće, tak zo jim dźěło wolóžamy“, rjeknyštaj sobotu Syman Michałk a Lorenz Lippitsch z předsydstwa kluba. „Podpěru dóstawamy wot firmow z města a regiona. Tale pomoc nam zmóžnja, festiwal při haće na dwaj dnjej rozšěrić a tak stajnje tež nowe hudźbne kapały přeprosyć.“ Předsyda kluba je mjeztym hižo dwě lěće Philipp Koplanski.