Hornje Sulšecy (SN/MWj). Štož je na druhich wsach hižo wjele lět z wašnjom, zo tam w adwentnym a hodownym času zjawny štomik swěći abo hinaša adwentna patych wjes porjeńša, maja wot lětušeho tež w hornich Sulšecach. Tam pak njeje so gmejna, w tym padźe Hodźijska, wo to postarała, ale wobydlerjo sami.
Kaž jedyn z iniciatorow Bosćij Bulank powěda, běchu hižo loni kónc lěta rozmyslowali, kak móhli sej wjes adwentnje wozdebić. „A tak smy sej myslili, zo by rjenje było, jeli móhli sej we wsy hwězdu powěsnyć“, rozprawja młody muž. Hakle měsac do adwenta pak započachu swoju akciju zwoprawdźeć. Nan Bosćija Bulanka Beno z tyzu po wsy chodźeše a prošeše wobydlerjow wo mały pjenježny dar, štož je lědma štó wotpokazał. Tak nazběrachu šwarnu sumu, z kotrejž móžachu nahladnu Ochranowsku hwězdu kupić. Za nju wobstarachu sej trěbnu žerdź a přičinichu ju při priwatnej ležownosći, kotruž jeje wobsedźer poskići.