Premjera Božu nóc w Róžeńčanskej cyrkwi překwapjenka była
Róžant/Bluń/Budyšin (SN/MiR/JaW). Serbscy ewangelscy kaž tež katolscy wěriwi su lětsa znowa měrne a spokojne hodowne dny přežiwili. Přewodźane běchu swjate dny wot wjacorych kulturnych wjerškow.
Wčera popołdnju su w Ralbičanskej cyrkwi Róžeńčanske dźěći hodownu hru předstajili. Po premjernym předstajenju patoržicu w Róžeńće bě to jich druhe předstajenje. W Ralbicach je cyrkwinski chór Lilija pod nawodom Bernadet Šołćineje druhi swjaty dźeń Božu mšu wobrubił. Runje tak su Ralbičanscy pozawnisća pod nawodom Joachima Dučmana wčerawše kemše w Róžeńće hudźbnje wuhotowali. Wobě ćělesy běštej zdobom kemše a poł hodźiny do Božeje nocy w Ralbicach wuhotowałoj, při čimž podpěrowaše jej znowa młodźinski chór. W Chrósćicach a Njebjelčicach su dujerjo a cyrkwinski chór Božu nóc wobrubili. W Chrósćicach dirigowaštaj Michał Cyž a Hańža Bjeńšowa, w Njebjelčicach prěni raz Chrystof Mikławšk.