Serbskemu blidu so přidružić

štwórtk, 28. decembera 2017
artikl hódnoćić
(0 )

Budyšin. „Dwurěčnosć je cool“, z tymle hesłom so we Łužicy za to wabi serbšćinu wuknyć. Prašenje za tych, kotřiž so na jednym z dosć rědkich kursow serbšćiny wobdźěleja, je: Hdźe móžeš nimo toho hišće swoje wobmjezowane kmanosće nałožować? W rozmołwje z maćernorěčnymi Serbami­ sej to mnozy zwjetša njezwěrja. We wjele kónčinach serbskeho sydlenskeho ruma bohužel njeje samozrozumliwe, zo so w zjawnosći serbuje. Tuž dyrbiš aktiwnje­ za serbskorěčnymi rumami pytać. Tajki namakaš we wšelakich rozmołw­nych kołach, kaž su na přikład ewangelske ,Bjesady a druhe skupiny. Ale tež Stajne serbske blido w Budyšinje tajku móžnosć skići. Wone wotměwa so nimale kóždu póndźelu w hosćencu ,,Alter Bierhof“, a to wot 18.30 hač do něhdźe 20.30 hodź.

Tele Serbske blido eksistuje mjeztym wot lěta 2013. Prawidłownje zetkawa so tam hač do pjeć maćernorěčnych a serbšćinu wuknjacych Serbow, zo bychu bjesadowali wo temach, kotrež jich runje zaběraja. To woznamjenja, zo nima Budyske Serbske blido žadyn kruty dnjowy porjad. Wuknjacym je to přiležnosć, swoje rěčne kmanosće bjez ćišća nałožować a dale wuwić. Mała skupina je starobnje jara rozdźělna. Powołansce skutkuja čłonojo w kubłanju, w terapeutiskim wobłuku a inženjerstwje kaž tež w digitalnym programěrowanju. Tak je zakład za wšelakore rozmołwne temy daty, a politika wězo wšitkich zajimuje.

Stajne serbske blido w Budyšinje ma hišće swobodne městna. Štóž chce so přidružić a so z rozmołwnym kołom zeznajomić, njech raz póndźelu wječor do hosćenca na Jerjowej pohlada. Štóž chce wěsty być, zo so Serbske blido tež wotměje, njech­ zazwoni nawodnicu dr. Beatu Brězanowu pod 03591 / 550 400 abo 0172 / 888 390 8. Přichodny raz zetka so Serbske blido 8. januara 2018. Günter Holder

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND