Ćeže nochcedźa wospjetować

pjatk, 02. februara 2018
artikl hódnoćić
(0 )

Rozdźělne měnjenja k planowanemu přetwarej bywšeje šule

Chrósćicy (JK/SN). Ke kontrowersnej diskusiji dóńdźe na wčerawšim posedźenju Chróšćanskeje gmejnskeje rady, jako předstaji wjesnjanosta Marko Kliman (CDU) naćisk za wobzamknjenje, pře­podać planowanske a přewodne dźěła we wobłuku naprawow za přetwar bywšeje srjedźneje šule we wsy na gmejnski a kulturny centrum. Za to předwidźa­neho architekta někotři radźićeljo wotpokazachu. Přičina su zdźěla wšelke misnjenja architekta při zwoprawdźenju twarskich dźěłow na nowej Chróšćanskej pěstowarni. Te pak móžachu z podpěru architekta krok po kroku wotstronjeć, tak zo pěstowarnja nětko bjezporočnje funguje. Dokelž skeptiscy radźi­ćeljo tajke situacije wospjet nazhonić nochcedźa, woni namjetowachu nadawk druhemu běrowej abo architektej přepodać, hač bu namjetowane, abo nadawk hinak wupisać dać. To pak wjesnjanosta wot­pokaza. Skedźbni na to, zo maja so trěbne podłožki a z nimi tež nadawk­ za twarski přihot a dohlad hač do 9. februara wotedać.

Chcyjo nochcyjo radźićeljo tola wo prěnjotnym naćisku wjesnja­nosty wothłosowachu a su jón ze snadnej wjetšinu schwalili. Dwaj radźićelej hłosowaštaj přećiwo wobzamknjenju, štyrjo so hłosa wzdachu. Proble­matika budźe radźićelow hišće dlěši čas zaběrać. Za twarske dźěła w Chrósćicach je wažne, namakać njewotwisnych a loyalnych fachowcow. To je tež w zajimje měrneje dźěławosće gmejnskeje rady.

Hrajkanišćo při šuli, hdźež so dźěći zakładneje­ šule a horta hrajkaja, dóstanje nowe nastroje. To bě gmejnska rada hižo loni wobzamknyła. Za to prócowachu so wo spěchowanske srědki z regionalneho programa Leader. Próstwa bu přiwzata a Budyski krajnoradny zarjad je spěchowanske srědki schwalił. Nětko su pjenjezy dóšli a naprawu w cyłkownej hódnoće něhdźe 11 000 eurow móža nalěto zwoprawdźić. Serbske šulske towarstwo jako nošer horta přewo­zmje gmejnski podźěl 25 procentow. Gmejna tuž nimo per­sonalneje podpěry při nastajenju nastrojow žane wudawki nje­změje. Starši a kubłarjo chcedźa nastroje nastajić pomhać.

Na spočatku bě Chróšćanski wosadny farar Měrćin Deleńk gmejnski zarjad a radźićelow za jich zamołwite a spomóžne dźěło požohnował.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND