Mjeztym 23. raz su minjenu sobotu we Wojerowskej Łužiskej hali wiki móžnosćow přewjedli. Po wšěm zdaću pak zarjadowanje dawno hižo tak přiwabliwe njeje kaž spočatnje.

Wojerecy (SR/SN). Pytajo rozhladowaše so Bärbel Wetzke minjenu sobotu po forumowej žurli Wojerowskeje Łužiskeje hale. Nimo mnohich informaciskich stejnišćow wona skónčnje pytaneho muža wuhlada. Wulki a ćmowy hladaše Čorny młynk z hoberskeho plakata. Pódla njeho steješe figurina we Wojerowskej serbskej drasće, na blidźe ležachu wobrazy wo rapakach a wo Krabaće. Tule při stejnišću Čornochołmčanskeho Krabatoweho młyna chcyše Bärbel Wetzke dnjowy wulět za Picnjansku skupinu seniorow organizować. „Sym za to ekstra sem přijěła“, praji rodźena Wojerowčanka. Ze sobudźěłaćerjomaj młyna Anku Stephan a Stephanom Urbetatom sej wona wšitko trěbne dorěča.