Čorny Chołmc (AK/SN). Swoju sylnu zwjazanosć z Čornochołmčanskim Krabatowym młynom je tamniši hornčer Andreas Hegewald zawčerawšim na cyle wosebite wašnje zwuraznił. Wón přepoda towarstwu Krabatowy młyn keramisku figuru Kantorki. „Za mnje je wona poprawny rjek Krabatoweje powěsće. Wona je lubosć do žiwjenja Krabata přinjesła, a tak zamó wón złu móc přewinyć“, hornčer wuswětli.
W lěće 2005 słušeše Andreas Hegewald k sobuzałožerjam towarstwa. Jeho trajna požčonka Kantorki ma stajnu wustajeńcu w Domje Jurja Brězana wobohaćić. Nimale 100 hodźin dźěła je za nju nałožił. Jeho mandźelska Ulrike, tohorunja hornčerka, je figuru wobarbiła a glazěrowała. Něhdźe šěsć kilogramow ćežka Kantorka je 54 centimetrow wulka. „Najwjetše wužadanje bě hłowa“, powěda Hegewald. Wot lěta 1988 wjedźe wón w Čornym Chołmcu hromadźe z mandźelskej hornčernju a čuje so mjeztym we wsy kruće zakorjenjeny.