Chcedźa woběmaj stronomaj wotpowědować a na maćeršćinu njezabyć
Budyšin (SN/JaW). Serbske a dwurěčne serbsko-němske wěrowanja w Hornjej Łužicy snadnje přiběraja. To je wuslědk naprašowanja našeho wječornika mjez stawnistwami regiona. Kaž z wotmołwow wuchadźa, poskića šěsć stawnistwow serbske a dwurěčne wěrowanja. Jeničce tři, mjez druhim we Łazu a Hodźiju, tajke docyła njeposkićeja. Kaž Łazowska stawnica Martina Schneider zdźěli, „njejsu pory dotal žanu potrjebu signalizowali“. W Rakecach, tak piše tamniši wjesnjanosta Swen Nowotny (CDU), „nachwilnje bohužel žane serbske wěrowanja wotměć njemóžemy, dokelž naša stawnica serbšćinu njewobknježi“.
Powšitkownje ludźo poskitk serbskorěčnych wěrowanjow skerje mjenje wužiwaja. „Ani lětsa ani w zašłych pjeć lětach njemějachmy tajke naprašowanje“, měni sobudźěłaćerka za zjawnostne dźěło města Wojerec Silke Braun. Tež w Njeswačidle maja „wob lěto jedne abo dwě serbskej wěrowani“, praji stawnica Petra Ziegenbalg.