Začuwa žiwjenski nadawk

pjatk, 15. junija 2018
artikl hódnoćić
(0 )
Monika Gerdesowa je putniska mać Chróšćanskeje putniskeje hospody, před kotrejž steji postawa putnika. Před dźesać lětami je wona ju wotewrěła. K jubilejej wotměje so za tydźeń wulki swjedźeń.  Foto: SN/Maćij Bulank Monika Gerdesowa je putniska mać Chróšćanskeje putniskeje hospody, před kotrejž steji postawa putnika. Před dźesać lětami je wona ju wotewrěła. K jubilejej wotměje so za tydźeń wulki swjedźeń. Foto: SN/Maćij Bulank

Chróšćanska putniska hospoda woswjeći dźesaćlětne wobstaće

Chrósćicy (SN/MWj). Runje wčera před dźesać lětami je Monika Gerdesowa w Chrósćicach swoju putnisku hospodu wotewrěła. Tónle jubilej tam wot 22. do 24. junija z runje tak wobšěrnym kaž naročnym programom woswjeća.

Ideja hospody bě nastała, jako pućowaše dźensniša putniska mać lěta 2007 z nižozemskej přećelku štyri dny ze Zhorjelca do Pančic-Kukowa. „Při tym so za princip putnikowanja zahorich a wróćich so domoj jako přeswědčena putnica. Zdobom pak tehdy spóznach, zo móhła mjez Budyšinom a klóštrom Marijinej hwězdu dalša hospoda być, dokelž je puć dosć daloki“, Monika Gerdesowa powěda. Dokelž bě dwě lěće do toho jeje mać zemrěła, kotrejež bydlenje hišće prózdne steješe, so z mandźelskim rozsudźi putnisku hospodu wutworić. Naprašowaštaj so tuž za wuměnjenjemi tajkeho domu pola towarstwa, kotrež so wo ekumeniski Jakubowy puć stara. A hižo tydźenjej pozdźišo steještaj prěnjej putnikaj před durjemi. „To njejsmy ani hišće přetwarjeć započeli“, so Chróšćanka dopomina. Nóclěh jimaj přiwšěm zaručištaj. Oficialnje wotewrěli su hospodu 14. junija 2008.

Składnostnje jubileja je Monika Gerdesowa raz zličiła, kelko putnikow móžeše mjeztym w Chrósćicach witać. Dohromady bě jich wjace hač 2 200. Wob lěto je jich ličba wobstajnje na 250 do 350 rozrostła. Najwjace bě jich 362. Bjez dźiwa, zo měješe we wšěch lětach wjele zajimawych rozmołwow a zo je ćežko jednu jako wosebitu wuzběhnyć. Hakle minjeny kónc tydźenja witaše wona młodej Ukrainjance, kotrejž wo swojim putnikowanju internetnje rozprawjatej. Z nimaj je so dołho wo politiskim połoženju na Ukrainje rozmołwjała. Jimaj kaž tež wšitkim tamnym putnikam, kotřiž w Chrósćicach přenocuja, dari putniska mać znamješko ze serbskim lipowym łopješkom, zo móhli sej je přityknyć.

Dźensa móže rjec, zo je wšo jeje priwatne žiwjenje z hospodu wupjelnjene. „Hospoda woznamjenja mi něšto rozsudneho a hłowneho. Začuwam to dźensa kusk jako swój žiwjenski nadawk.“ Za přichodne dźesać lět sej wona přeje, zo by Jakubowy puć putniski wostał a zo njeby so z turistiskim pućom stał, „přetož turist sej žada, ale putnik so dźakuje“.

Jubilejny swjedźeń zahaja pjatk, 22. junija, w 19 hodź. z wotewrjenjom fotoweje wustajeńcy wo ekumeniskim putniskim puću a wo dźesaćlětnym wobstaću hospody. Sobotu po zhromadnej snědani we 8.30 hodź. a naslědnej rańšej nutr­nosći móža so zajimcy cyły dźeń wo putniskich pućach w Europje informować. K tomu wotměje so dźěłarnička, kak ­nachribjetnik prawje přihotuješ, w 11 hodź. budźe swětłowobrazowy přednošk a w 14 hodź. čitanje. Wjeršk budźe w 17 hodź. swójbny koncert zna­teho spěwy­twórca Gerharda Schöny na Koklic statoku. Zastupne lisćiki předawa mjez druhim Chróšćanski časnikar Jürgen Njek. Po tym móža sej zajimcy zhromadnje koparsku hru Němskeje přećiwo Šwedskej wobhladać abo w hospodźe ­na přednošk wo putnikowanju słuchać. Njedźelu w 13 hodź. móža so zajimcy na miniputnikowanje do klóštra Marijineje hwězdy po­dać. Při bjesadźe popołdnjo potom wuklinči.

Cyły kónc tydźenja organizuje Monika Gerdesowa hromadźe z Chróšćanskim wjesnym towarstwom Domizna, kotrehož čłonojo staraja so wo jewišćo, blida a ławki kaž tež wo ćělne derjeměće wopytowarjow. „Nadźijam so při rjanym wje­drje prawje wjele wopytowarjow ­a mnohich zajimawych rozmołwow“, praji putniska mać. Wona skedźbnja ­na to, zo so koncert Gerharda Schöny tež při špatnym wjedrje wotměje.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND