Daloko sahacy rozsud za přichodne lěta w delanskej gmejnje
Róžant (SN/MWj). Štož su w Chrósćicach a Njebjelčicach minjene lěta zmištrowali, chcedźa nětko tež w Ralbicach zwoprawdźić. Tam chcedźa tuchwilne twarjenje pěstowarnje, kotraž je w nošerstwje Serbskeho šulskeho towarstwa, na hort přetwarić. Pódla njeho ma nowa pěstowarnja ze žłobikom nastać. To je gmejnska rada Ralbic-Róžanta wčera z jednym wzdatym hłosom wobzamknyła. Do toho bě Michaela Gedikowa jako zastupjerka staršich gmejnskich radźićelow napominała, k swojej zamołwitosći stać a w zmysle młodych swójbow jednać.
Projekt płaći 3,5 milionow eurow. Kaž přirjadnik Budyskeho krajneho rady Udo Wićaz wčera w Róžeńće podšmórny, wón gmejnu při planowanju podpěruje. Hladajo na twarsku sumu pak skedźbni na to, zo dyrbja projekt po wšej Europje wupisać, čehoždla drje budźe so předewzaće dlić. Njejsu to jenož wupisanja twarskich dźěłow, předewšěm planowanje a pruwowanje trajetej stajnje wjacore měsacy. Wićaz liči z tym, zo móhli srjedź lěta 2020 twarić započeć.