Kak ma wjes wupadać?

wutora, 30. oktobera 2018
artikl hódnoćić
(0 )
Sten Kowalick a Robert Koitschka (wotlěwa) před naćiskom twarskeho plana za nowy Miłoraz  Foto: Constanze Knappowa Sten Kowalick a Robert Koitschka (wotlěwa) před naćiskom twarskeho plana za nowy Miłoraz Foto: Constanze Knappowa

Na wobydlerskim dialogu plany za nowy Miłoraz předstajili

Miłoraz (CK/SN). Wona přeje sej ručež móžno přesydlenje, praji Liesbeth Fabian. To měješe so hižo před pjeć lětami stać. 74lětna chce „skónčnje wědźeć, kak dale póńdźe.“ Tuchwilne połoženje je ćežke dosć. Rodźena Miłoražanka a jeje syn André, kiž w swojim staršiskim domje bydli, běštaj dwaj z wjace hač 80 zajimcow tele dny na wobydlerskim dialogu w Miłorazu. Slepjanska gmejna bě k tomu na žurlu Miłoraskeho hosćenca „K wočerstwjenju“ přeprosyła. Tam móžachu so ze zastupjerjemi gmejny, ­zarjadnistwow, LEAG a z planowarjemi rozmołwjeć, sej naćisk twarskeho plana za nowy Miłoraz wobhladać a so wo znowana­twarje towarstwoweho domu, kupjele a wo wjele dalšim wobhonić. Wužiwali su to mnozy Miłoraženjo, ale tež wobydlerjo Slepoho, kotřiž mějachu wjele prašenjow wo přichodnym susod­stwje, zwěsći Sten Kowalick z přirady za přesy­dlenje.

Zarjadowanje bě myslene jako forma zjawneho wobdźělenja, k čemuž je gmejna we wobłuku nastajenja twarskeho plana winowata. Po měsacy trajacych přihotach běchu wšitke plany prěni raz zjawnje přistupne. „Nam bě wažne z wobydlerjemi rěčeć“, rjekny Slepjanski wjesnjanosta Reinhard Bork (njestronjan). Po jeho słowach so nadźijeja, zo Miłoraženjo swoje pokiwy k naćiskej plana zapodadźa. Tak měło na přikład busowe zastanišćo bliže k bydlenskim domam być. Prašenja mějachu wopytowarjo k nowemu Miłoraskemu pohrjebnišću, kotrež ma swoje městno pódla Slepjanskeho měć, a to ze swójskim zachodom. Druzy wobhonichu so wo šěrokosći dróhow a wo planowanych chódnikach.

„Zajim bě wjetši hač wočakowany“, měnješe přesydlenski manager LEAG Martin Klausch. „Na tym je spóznać, zo njeje tale tema jenož Miłoražanam samym wažna.“ Wjacore razy narěčachu jeho dalšeho časoweho wotběha dla. Pola LEAG so nadźijeja, zo Trjebinska gmejnska rada na wurjadnym posedźenju 5. nowembra zakładnemu zrěčenju wo přesydlenju přihłosuje. Kaž hižo při zwrěšćenym wothłosowanju minjeny tydźeń bě tež na wobydlerskim dialogu jasnje pytnyć strach Miłoražanow, zo móh­ło tola hišće něšto přesydlenju zadźěwać. Tohodla wostanje Robert Koitschka skeptiski. Rodźeny Miłoražan by rady na nowym městnje dom za swoju swójbu twarił. 36lětny so nadźija, zo nětko skónčnje „woła za rohi wozmu“. Hladajo na wuhlowu komisiju pak wón doda, zo hač k jeje rozsudej „nima zmysła, sej nětko hižo nowe žiwjenje wumolować“.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND