Dróhotwar a wopłóčki

póndźela, 05. nowembera 2018
artikl hódnoćić
(0 )

Gmejna wuda wjele pjenjez za planowanu nowu zakładnu šulu

Hodźij (CK/SN). Za hłubokotwarske dźěła planuje gmejna Hodźij klětu 947 000 eurow. Twarić chcedźa wjesny wopłóčkowy kanal w Debiškowje (Döbschke). Tež w Njezdašecach (Nedaschütz) stej nowy wopłóčkowy kanal a dróhotwarski projekt předwidźanej. To wuchadźa z naćiska hospodarskeho plana za 2019, z kotrymž je so gmejnska rada na swojim zašłym posedźenju zaběrała. W nim zapřijatych je 259 000 eurow, kotrež chcedźa takrjec přihotowane měć, móža-li ležownosć za nowo­twar zakładneje šule kupić. Jako dochody planuja poł miliona eurow spěchowanskich srědkow, klučowe připokazanki Swo­bodneho stata Sakskeje a dróhotwarske přinoški wobydlerjow. Kaž wjesnjanosta Gerald­ Meyer (njestronjan) rozłoži, so sadźby za ležownostny a přemysłowy dawk klětu njezwyša. Dohromady steji pod smužku deficit 238 000 eurow. Při­wšěm płaći plan jako wurunany, dokelž jedna so při minusu wo wotpisanja za stare zamóženstwo.

Komornica Ines Henichowa poda nimo toho wuhlad na inwesticije přichodnych lět. Najwjace pjenjez nałoža 2020 a 2021 za planowanje noweje šule, mjenujcy po 250 000 eurach. Šula sama ma w lěće 2022 za něhdźe pjeć milionow eurow nastać. Hat w Dobranecach (Dobranitz) chcedźa saněrować a hašenske jězdźidło za Brězowsku wohnjowu woboru kupić. Dale natwarja wopłóčkowy kanal w Žičenku (Kleinseitschen) a Hornjej Boršći (Oberförstchen).

Spočatnje wšak scyła za tym njewupadaše, zo změje Hodźijska gmejna za swoje předewzaća dosć pjenjez. Komornica Ines Henichowa pak móžeše gmejnskich radźićelow w tym nastupanju znajmjeńša zdźěla změrować. Na jednym boku su někotre za lětsa pla­nowane wjetše inwesticije wotprajili a pjenjezy za nje na přichodne lěto přestorčili. Na tamnym boku předa gmejna hišće lětsa twarjenja při Darinskej dróze w Hodźiju, štož měješe so poprawom hižo loni stać.

Po zjawnym wupołoženju chce Hodźijska gmejnska rada klětuši etat 15. nowembra wobzamknyć a nazajtra wo­krjesej k schwalenju zapodać, štož móhło so potom hišće hač do kónca lěta stać.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND